كيلو الاوطة بسبعة جنيه
رايك ايه يا سعادة البيه
والخضار راح ناكله سوتيه
علشان يعجب اباظة بيه
وبطلنا كمان الشاى والكافيه
والسيجارة اللى بقت بنص جنيه
الله يسامحك يا بطرس بيه
يعنى خلاص قفلت يا بيه
مامعناش حتى النص جنيه
آه يا حكومة يا بنت الايه
ليه يا سمرة يا أم خد جميل
يا زهرة مروية بميه النيل
ليه طال عليكي يا حلوة الليل
وانطفت فيكي القناديل
ليه فيكي الحال بقي عليل
وشعبك عايش فيكي ذليل
ليه البكي ملء المناديل
وضاع الأمل من جيل لجيل
يا حكومة حرام عليكي
سيبينا بقي نبوس رجليكي
علي طول فاتحة ايدكي
وعمالة تشوطي برجليكي
امشي بقي الله يهديكي
امش ومش ها نندم عليكي
هي راحت فين عنيكي
بصي شوية حواليكي
ما حدش ماسك فيكي
سألوني ايه الأخبار
قلت العيشة بقت نار
شقيان ليل ونهار
وشغال زي الحمار
وبرضه كله طار
أصل ده زمن الشطار
والبلطجية ونواب القمار
مش زمن اهل الدار
آه…………ليل ومالوش نهار
ونهاره دمار في دمار
تشوف الخير فيها أنهار
بينهبو كام واحد من الشطار
البلد مابقتش بلدنا
والمال مابقاش مالنا
والحال مش هو حالنا
ولا دى هى أخلاقنا
هو أيه اللى جرالنا
مالنا يا خلق مالنا
أيه غير أحوالنا
راحت فين أحلامنا
وخابت ليه آمالنا
فين ورث أجدادنا
فين شهامة ولادنا
فين أمجاد الفراعنة
فين الورق أبو مدنة
يا حكومة خلي عندك دم
وارحلي بقي جتك الغم
شيلتي شعبك الهم
وما بفاش لاقي حتي المم
لا وشيلتي عنه كمان الدعم
يا حكومة من غير أم
ولا ليها أب يضم
ارحلي وخلي عندك دم
الي كل مصري أصيل
بياكل ويشرب من ميه النيل
وشقيان من الصبح للليل
ويدوبك فيها رزقه قليل
ومن الفقر بقي زليل
كفاية بكي في المنديل
وكلام وصراخ وعويل
ليه سايب نفسك عليل
ينهشوك كلا.. الليل
ده لسه فيها نخيل
ايه جرالك يا بنت العم
حالك كده بقي يغم
بعد ما كنتي احن أم
للقريب والغريب بتضم
شيلتي ناسك الهم
وحالتهم بقت يم
مش لاقيين حتي المام
عيشة مالهاش طعم
ومسئولين ما عندهمش دم
وحركاتهم نص كم
جاتهم الغم
محتاجين تغير دم
وخد عنك يا عم
ده واحد سرقنا
وفي السوق باعنا
وبيتصعب علي حالنا
وبيقول ايه جرالنا
بيلعب بفلوسنا
فال خايف لا الفقر يدوسنا
راح عامل ضرايب حتي علي نفسنا
والتاني نضيف ونضف جيوبنا
وخرب بيوتنا
طب يا سادة ادونا هدنة
نشم فيها نفسنا
وده واحد بيبيع في كلام
تمام يا افندم تمام
الشعب كله نام
شغلناه بنانسي وهيام
سلامتك ياولد من اللى جرالك
ده مكانش يخطر على بالك
عتحلم ينصلح حالك
واه يابوى اهم سرجوا مالك
مش عربى ولا خواجه
لاع دولى اعمامك وخوالك
يعنى يا بوى حراس املاكك
نهبوا كل اموالك
زوروا وباعوا فى ورجاتك
وناويين على هلاكك
لكن ياولد عجلك فراسك
تلم اعمامك وناسك
جرايبك وخواتك
كل ولد حر فى بلادك
واسعى لاجل تنول خلاصك
يللا ياولد افتح كراسك
واكتب بجلمك واخلاصك
خبرنا عن بلدك وناسك
خبرنا بكل احساسك
كيف ياولد الغول داسك
ايوة يابوى
مالت بينا السفينة
بعد ماسيبنا مراسينا
لاحد نمد له ايدينا
ولاحد ياخد بايدينا
لا زاد يكفينا
ولا غطا يدفينا
احنا ولاد الملك مينا
اللى وحد أهالينا
بقى ده يجرى لينا
كده تضيع أمانينا
ننسرق قدام عينينا
ويقولوا ماطمرش فينا
فيكى ياما غنينا
وليكى ياما اتمنينا
